青青一個人制霸日本都道府縣

☞ 本來今日先係去伏見稻荷不過因為尋日起唔到身，所以同今日嘅行程對調。因為今日去嘅地方要個幾鐘嘅車，所以都要早啲起身，去嘅地方就係京都府鞍馬寺 同貴船神社 。

☞ 呢個地方係同事介紹我先認識，初初真係未聽過。朝早九點幾出發，去到個站已經覺得好正，四面環山，陽光普照，好寧靜，相比之前去嘅伏見稻荷同宇治更加令人覺得好舒服。

☞ 一路行去鞍馬寺，沿途唔見任何人，冇幾耐就到咗鞍馬寺，個玄關真係好靚，加上周邊兩排非常別緻嘅引路燈柱，個種嘅自然美真係好無敵。而且兩旁亦都種滿咗好多樹，即使啲樹都落晒葉，但冇破壞到樹本身襯托環境嘅功用，反而迎刃出另一種美態，呢種清幽嘅感覺令人覺得好好享受。

【好斜嘅電車@山門駅至多宝塔駅】

☞ 之後要搭電車上另一個山頭，架電車都相當斜，我諗20到30度都有。車箱裡面每行一部都上一級繼續向前，呢種設計都幾特別。落車之後就繼續向前行，沿路都唔係太難行，都係一啲小石級同斜嚟。

☞ 再向前行就見到一個平地，可以眺望出面嘅景像，發現有啲類似晨運嘅人做早操。咁當然啦，地方咁靜咁靚，做早操都零舍精神添。背後就有一條樓梯，係通去鞍馬神社嘅地方，而樓梯嘅上面都見到一間廟堂嘅東西，當中嘅樹木隱若將廟堂收埋一邊，呢番景像真係好靚。

【好廣闊嘅神廟@鞍馬寺頂】

☞ 上到去神社嘅地方，佔地非常廣闊。當中仲有好幾間神廟，反而個地方有一面係可以望到對面另一座山，一路望一路感覺呢一日好有嶄新嘅感覺。停留咗一陣開始向上繼續行，係開始要上較高嘅石級喇。同埋啲路開始越嚟越窄，行落都有啲辛苦。當中記得一路行上去個陣，亦都有一個鬼佬喺我前面行，而且睇佢都係自己一個人行，而且行嘅方向同我嘅係一樣，但就大家冇講個嘢，只係佢同我講咗句Konichiwa，而且亦都同佢講句Konichiwa，因為大家行山上其實都攰攰哋，冇乜氣，好難會講啲咩。

【勁多樹根@木之根道】

☞ 上到一個地方地下勁多樹根，原來係其中一個checkpoint，木之根道。周圍地上嘅樹根交織喺一齊，而啲根就係周邊兩旁嘅樹嚟，都幾特別。不過行路嗰陣就要小心啲，都幾容易碰到地上嘅樹根失平衡，不過樹根嘅數量唔算多，而且兩旁嘅位置亦都唔係好陡峭。

☞ 喺嗰度逗留咗一陣影吓相咁，突然開始有啲雨粉落嚟，之後就開始有啲大，所以都準備落山。一路落山就一落住雨，而且落山嗰陣地下上面都仲有好多剛才嘅樹根，所以都要小心❕自己就冇開遮，因為嗰度啲樹葉都幾密，都可以擋住啲雨水。

【貴船神社】

☞ 大約行咗四，五個字就落返嚟地面，向前行一陣就係貴船神社，當然要上去望一望。雖然都係一啲普通神社，裡面唔算好大。最吸引都係一入嚟上樓梯級入去神社係幾靚。然後繼續向前睇有啲咩，不過其實前面係冇嘢睇。右邊有一條河流，而左邊有啲冇開門嘅舖頭，同埋一間唔知咩舖頭嚟。不過當時我覺得總係仲有啲嘢行所以繼續向前。不過繼續向前只發現得一個神社嘅入口，但又寫社貴船神社，不過呢個係叫奧宮，不過就得個神社，比貴船神社仲細。然後再望前面發覺淨得行車山路，完全冇其他野，加上經已係就快五點，天開漸黑，而且條路上得返我一個人喺度，所以決定折返。

【天黑起嚟 + 自己一個人行車路】

☞ 離開就向下行，諗住一路落去就離開到，不過一路行落去其實係行緊一啲車行嘅山路，係冇行人路。一直行咗好內都唔見有任何人經過，同買都係啲車經過。沿路除咗雨聲同河流水聲都冇其他聲，又唔見人而且自己行緊嘅係車路，所以開始有啲懷疑自己係唔係行啱路，但記得地圖係話由貴船神社行返落去就啱，不過冇人加上天真係黑起嚟所以真係有啲擔心，雖然沿途係有啲街燈，但係呢啲得自己一個個唔知係唔係係啱路嘅時候其實真係有啲驚。再行多陣終於見到個車站，原來係叡山電鐵嘅貴船口站。見到心情都放鬆晒，起碼會離開到。咁嗰陣個天就快黑齊，好彩見到個車站。

【免費溫泉@峰麗湯】

☞ 喺呢個時候記得仲有個最後checkpoint要去，就係返返去鞍馬站，再坐免費嘅shuttle去浸免費嘅溫泉，叫峰麗湯。去到浸真係山上嘅天然溫泉，都係第一次，而且浸嗰陣真係夜晚嚟，天完全黑晒。一路浸都好舒服，不過自己就覺得好好奇係咁凍喺露天自己都頂得信都OK喎。而且又諗埋啲無聊嘢，點解呢度山頭唔見蛇蟲鼠蟻喺度經過，或者應該咁講，行成個鞍馬山都唔覺有，都幾奇怪，掉轉係香港應該勁多昆蟲喺度。

☞ 浸完就再坐Shuttle返鞍馬站搭返去出柳町站再返大阪難波。返到去都已經係九點幾，所以求其揾間食咖哩就算。

【以為鐵路一定好夜先收?】

☞ 呢日都覺得幾好玩，鐘意咁樣行吓啲寧靜嘅郊區地方，真係幾舒服唔錯。不過，依加我覺得自己由離開貴船神社到貴船口站其實真係好好彩，經過之後好多次唔同嘅日本地方先知，因為唔係度度地方行車路係有街燈嘅。另外，列車唔係去到好夜仲有，尤其啲山區可能係八九點就收，但我冇睇時間表仲就去浸溫泉，仲用香港MTR嘅概念以為鐵路一定好夜先收，諗返喺其實真係好好彩。

-----------
 鞍馬寺
-----------

☞ 參觀費用 : 300円

☞ 交通 :
乘坐京阪電車出町柳駅至鞍馬駅下車 (30分鐘)

☞ 纜車 (山門駅至多宝塔駅) (2分鐘)
費用 : 200円
時刻表 : 山門駅 (8:40 -16:30 / 17:00), 多宝塔駅 (8:45 - 16:35 / 17:05)

☞ 網址 : http://www.kuramadera.or.jp/index.html

--------------
 貴船神社
--------------

☞ 網址 : http://kifunejinja.jp/index.html

前往鞍馬山交通介紹

☞ 京都駅出發:

京都駅→烏丸御池駅→三条駅→出町柳駅→鞍馬駅 [1小時28分鐘, 890円]
(京都地下鉄烏丸線(国際会館行)→京都地下鉄東西線(六地蔵行)→京阪本線特急(出町柳行)→叡山電鉄鞍馬線(鞍馬行))
*可以使用"關西周遊卡"*
"關西周遊卡" : http://www.surutto.com/tickets/kansai_thru_hantaiji.html

☞ 梅田駅 / JR大阪駅出發:

梅田駅→東梅田駅→天満橋駅→出町柳駅→→鞍馬駅 [ [2小時1分鐘, 1,070円]
(徒歩→大阪市営谷町線(八尾南行)→京阪本線特急(出町柳行)→ 叡山電鉄鞍馬線(鞍馬行))
*可以使用"關西周遊卡"*
"關西周遊卡" : http://www.surutto.com/tickets/kansai_thru_hantaiji.html